Një ngjarje krejt e pakëndshme është regjistruar ditën e djeshme në Prishtinë, ku kamerat kanë filmuar videon e rastit kur një burrë fillon dhe dhunon tre vajza duke i goditur me grushte dhe me shkop.
Sipas informacioneve të marra bëhet me dije se është dorëzuar në policinë e Gjakovës, autori i dhunës së tri vajzave dje në Prishtinë.
Lajmi është bërë i ditur nga mediat në Kosovë, që kanë publikuar dhe pamjet e sulmit. Në to, shihet një person i revoltuar që afrohet me shpejtësi për të goditur tre vajza, ata fillimisht ikin të trembura, por më pas, tentojnë që të mbrohen. Por burri duket se nuk dorëzohet dhe pasi dhunon me grushte e shkop vajzat, largohet me shpejtësi.
Sipas mediave, vajzat punonin në një qendër masazhi në Prishtinë dhe nga dëshmitë e tyre, rezulton se burri ka kërkuar shërbim ekstra, gjë e cila nuk është ofruar nga vajzat.
Zëdhënësja e Policisë së Kosovës për rajonin e Prishtinës, Flora Ahmeti ka thënë e rasti ka ndodhur ditën e djeshme rreth orës 18:00.
I dyshuari është vetëdorëzuar në polici për disa lëndë që i ka pasur në Komunën e Rahovecit. Rasti i tij do të kalohet nën kompetencat e Policisë së Prishtinës lidhur me rastin e sulmit fizik ndaj tri vajzave që ndodhi dje në kryeqytet.
