Një ngjarje e rëndë ka ndodhur mbrëmjen e djeshme rreth orës 22:30 në ambientet e kompleksit “Delijorgji” në Tiranë, ku është dhunuar brutalisht pronari i restorantit “Tokyo”, Laert Kasaj.
Autorë të dyshuar të sulmit janë vëllezërit Ferhat dhe Olti Kaja, pronarë të lokalit “Stockholm”, që ndodhet përballë kompleksit.
Sipas burimeve pranë Policisë, konflikti dyshohet se ka nisur për shkak të një denoncimi të mëparshëm të bërë nga Kasaj pranë autoriteteve, ku ai kishte raportuar për uzurpimin e hapësirave publike dhe vendosjen e tendave të paligjshme. Pikërisht ky denoncim mendohet të ketë qenë shkaku i përplasjes fizike.
Ngjarja ka ndodhur jashtë lokalit dhe ka përfunduar me përplasje fizike, ku Kasaj ka marrë dëmtime të rënda. Ai është dërguar me urgjencë në spital dhe ndodhet ende nën kujdes intensiv.
Sipas të dhënave, konfrontimi ka nisur fillimisht si debat verbal, por më pas ka degjeneruar në dhunë fizike mes palëve.
Vëllezërit Kaja janë shpallur në kërkim nga Komisariati nr. 2, ndërsa policia ka nisur hetimet për zbardhjen e plotë të ngjarjes dhe identifikimin e përgjegjësve.
Pamjet e dhunës fizike të regjistruara nga qytetarë tregojnë momente të rënda, ku viktima shihet me fytyrë të përgjakur duke kërkuar ndihmë.
Autoritetet po hetojnë për identifikimin dhe ndalimin e autorëve të dyshuar të sulmit.
