Në Dibër është arrestuar një 43-vjeçar për shkak të dhunës që ka ushtruar ndaj bashkëshortes së tij.
Theksojmë që dhuna ka qenë verbale dhe joverbale.
Bashkëshortja e tij, pas dhunës, ka tentuar t’i japë fund jetës duke konsumuar lëndë helmuese.
“Ushtroi dhunë psikologjike dhe fizike ndaj bashkëshortes së tij, vihet në pranga 43-vjeçar. Nga specialistët për Hetimin e Krimit në Komisariatin e Policisë Dibër, u bë arrestimi në flagrancë i shtetasit B. M., 43 vjeç, banues në Dibër. Materialet i kaluan Prokurorisë për veprime të mëtejshme”, thuhet në njoftimin e policisë.
Vlen të përmendim se në Shqipëri fenomeni i dhunës ndaj grave dhe vajzave vazhdon të jetë një sfidë për autoritetet dhe shoqërinë.
Denoncimet për këtë dhunë në familje në 5 vitet e fundit janë rritur me 21%, dhe sipas autoriteteve kjo tregon se ajo ka qenë e fshehur. Gjatë dy viteve të pandemisë së Covid 19 ky fenomen u përkeqësua, gjë që çoi në rritjen e numrit të vrasjeve të grave dhe vajzave. Zyrtarët nënvizojnë se ka disa përmirësime ligjore me qëllim zbutjen e këtij fenomeni ndërsa përfaqësues të shoqërisë civile thonë së ende mbetet shumë për të bërë.
Përfaqësues të shoqërisë civile argumentojnë, se pandemia ndikoi në thellimin e problemeve sociale, që sipas tyre solli dhe rritjen e dhunës dhe të vrasjeve të grave dhe vajzave
