Policia e Tiranës ka proceduar në gjendje të lirë 35-vjeçaren Genta Gjalpi, pas publikimit të një videoje në rrjetet sociale ku shfaqet duke ushtruar forcë ndaj vajzës së mitur të bashkëjetuesit të saj.
Gjalpi, një personazh i njohur në platformën TikTok, është nën hetim për akuzën e dhunës në familje.
Policia ka njoftuar se janë duke u kryer hetime për të sqaruar rrethanat e këtij rasti.
Në pamjet e shpërndara, shihet Genta Gjalpi së bashku me vajzën e mitur pranë një marketi, ku Gjalpi e kap dhe e tërheq vajzën pas një përpjekje për të bërë pagesën. Vajza tenton të largohet, por Gjalpi e ndjek dhe e shtyn për ta nxjerrë jashtë dyqanit.
Ndër të tjera një koment që ra në sy mes qindra të tjerëve në video është i një zonje e cila prezantohet si nëna e vajzës së mitur dhe shprehet në këtë mënyrë
“Unë jam nëna e fëmijës në video dhe më dridhen duart nga ajo që po shoh. Ky njeri që ngre dorë mbi vajzën time, do të përballet me ligjin!”
Ndërkohë, Genta Gjalpi nuk ka bërë ende ndonjë reagim publik për ngjarjen dhe nuk dihet ende se çfarë ka ndodhur.
