Komiteti Shqiptar i Helsinkit ka reaguar lidhur me një rast të dhunës ndaj një 14-vjeçari, i cili, sipas prindërve të tij, është ndaluar dhe dhunuar nga Policia e Shtetit në Komisariatin Nr. 1 më 12 prill 2025.
Ata njoftuan KSHH-në për ngjarjen, duke pretenduar se djali i tyre u shoqërua nga policia dhe u përball me dhunë fizike dhe psikologjike.
Pas njoftimit, më 22 prill 2025, dy vëzhgues të KSHH-së vizituan Komisariatin Nr. 1 për të verifikuar pretendimet. Nga ky verifikim, rezultoi se i mituri, J.G., ishte shoqëruar në komisariat për dyshimin për prishje të qetësisë publike dhe hedhje kapsollash.
Sipas raportit të shoqërimit, ishte regjistruar një hematomë në syrin e djathtë të tij, por nuk ka pasur ndihmë mjekësore të siguruar. Komiteti i Helsinkit theksoi se kjo ka shkelur procedurat që parashikojnë trajtimin e të ndaluarve në ambientet e policisë.
Në lidhje me këtë rast, Policia e Shtetit ka reaguar dhe njoftuar se, më 12 prill 2025, shërbimet e Komisariatit të Policisë Nr. 1 shoqëruan 14-vjeçarin për dyshimet se kishte hedhur kapsolla në zonën e Liqenit Artificial, pas shqetësimit të banorëve.
Policia ka pohuar se ndaj tij u ndërmor procedimi për veprën penale “Prishja e qetësisë publike” dhe është lënë në gjendje të lirë.
Pas pretendimeve të prindërve për dhunë, Policia ka nisur një procedim disiplinor për tre punonjës të Komisariatit Nr. 1, duke i akuzuar për shkelje të etikës dhe ka dërguar rastin në Prokurori për hetime penale. Punonjësit që po hetohen janë Inspektori D.M., Inspektori R.D. dhe Nënkomisari Xh.B.
Gjithashtu, Agjencia e Mbikëqyrjes Policore ka referuar materialet në Prokurori për të hetuar veprat penale “Kryerja e veprimeve arbitrare” dhe “Dëmtime të tjera me dashje”. Po ashtu, Drejtoria e Standardeve Profesionale ka nisur një hetim administrativ për të vlerësuar nëse këta punonjës kanë shkelur detyrat dhe rregullat e Policisë së Shtetit.
