Ditën e sotme është zhvilluar mbledhja midis dy qeverive asaj të Shqipërisë dhe Malit të Zi.
Ndërkohë që pas mbledhjes të dy krerët e qeverive përkatëse kanë zhvilluar një konferencë për shtyp. Kryeministri i vendit tonë, Edi Rama ndër të tjera vendosi theksin edhe tek ngjarja e rëndë, dhuna që një polic malazez ushtroi ndaj profesor Petraq Milos, anëtar i Partisë së Lirisë.
Rama falënderoi autoritetet përkatëse malalzeze për reagimin e menjëhershëm pas publikimit të videos së rëndë, ku shfaqej dhuna që ushtroi polici malazez në pikën kufitare të Muriqanit në Malin e Zi ndaj një shtetasi shqiptar, me pretendimin se ai nuk po respektonte radhën.
“Dua ta falenderoj për faktin që që në sekondin e parë të daljes së asaj videos i ka kërkuar ndjesë profesorit. Janë marrë të gjitha masat. E gjitha kjo është bërë me një xhentilesë maksimale dhe me një urtësi maksimale. Janë raste që ndodhin, u ndodhin dhe shqiptarëve me policinë shqiptare apo malazezëve me policinë malazeze. Këto janë rastet që mezi i presin për të ndezur flakën e nacionalizmit dhe për të kërkuar që të ndërpriten marrëdhëniet diplomatike. Ndaj na duhet më shumë bashkëpunim rajonal”, u shpreh Rama.
Kujtojmë që Milo po udhëtonte me familjen e tij drejt Malit të Zi, kur u përball me akte të rënda dhune nga Policia e kufirit, që tentoi ta nxjerrë zvarrë nga makina.
Ngjarja ka ndodhur me 15 janar të këtij viti, por u desh që të publikohej videoja në mënyrë që autoritetet malazeze të reagonin duke marrë masat e duhura.
