Projekti i “Unazës së Madhe” ka qenë me pasoja të shumta pasi jo vetëm që u janë shembur banesat banorëve në disa zona të Tiranë, masivisht tek “5 Maji”, gjithashtu ka pasur edhe përplasje midis qytetarëve që bëjnë rezistencë dhe forcave policore.
Ndërkohë që ditën e sotme banorët e “5 majit” i janë drejtuar sot prokurorisë së Tiranës ku pritet të dorezojnë një kallëzim ndaj dhunës barbare që është ushtruar ndaj tyre dhe familjarëve. Një prej banorëve përpara prokurorisë tha se ata kanë bërë kallëzim edhe në policinë e Tiranës. Edhe pse u shpreh skeptik nëse do të arrihet ndonjë gjë.
“Kanë dhunuar barbarisht familjarët. Do bëjmë kallëzimin. Kemi bërë denoncim në polici dhe tani në prokurori. Tani të shohim drejtësinë”- u shpreh një nga banorët.
Prej ditësh banorët e “5 majit” protestojnë kundër prishjes së banesave të tyre ndësa janë përplasur edhe me policinë. Kjo e fundit ka ushtruar dhunë duke i nxjerrë me forcë nga banesat e tyre.
Ditën e sotme ata protestuan para parlamentit ndërsa 3 prej tyre u takuan edhe me kryeministrin Edi Rama. Disa prej banesave te “5 maji” që do prishen në kuadër të rindërtimit janë në proces legalizimi ndërsa për disa të tjera banorët gëzojnë certifikatë pronësie.
Përplasjet mes banorëve të zonës së ‘5 Majit’ dhe forcave të policisë ishin prezente edhe ditën e djeshme. Banorët, banesat e të cilave pritet të shemben pritën gjithë natën për të kundërshtuar shembjen e tyre. Përplasjet nisën nga një i ri i cili u doli para policëve për të kundërshtuar shembjen e banesës së tij.
