Dhuna në futbollin shqiptar është tashmë e njohur, por kjo e ndodhur ditën e sotme në ndeshjen mes Tiranës dhe Laçit nuk ka pasur protagonist tifozët dhe arbitrat, por lojtarin e Tiranës dhe Presidentin e Laçit.
Futbollisti i Tiranës Majkëll Ngoo ka pasur një përplasje të fortë me presidentin, Pashk Lasa dhe anëtarë të tjerë të klubit kurbinas për arsye që ende nuk dihet.
Mirëpo një video e bërë publike nga kamerat e sigurisë tregon qartë gjithë situatën e ndodhur, që nga nisja e deri në konfrontimin fizik.
Në video duket qartë që lojtarët ishin të qetë dhe të drejtuar për në dhomat e zhveshjes, ndërkohë që në korridor qëndronte presidenti Lasa. Në një moment, Lasa i drejtohet anglezi Ngoo dhe nga lëvizjet e duarve dhe mimika duket se komunikimi ka qenë me tone të larta.
Në një moment shohim futbollistin bardheblu që qëndron para tij dhe në një moment tenton që ta godasë, mirëpo në atë moment ka ndodhur përplasje ku edhe pjesëtarë të Laçit e kanë rrethuar futbollistin duke e qëlluar dhe është dashur ndërhyrja e lojtarëve dhe të të dy skuadrave, e pjesëtarëve të sigurisë së stadiumit dhe policisë që të shpërndaheshin të gjithë për në vendet e tyre.
