Ditën e djeshme një telefonatë anonime që tregonte se në Gjykatën e Apelit, Tiranë është një bombë e vendosur, çoi në “këmbë policinë”.
Ndërkohë që ditën e sotme shtë identifikuar dhe arrestuar shtetasi J.K. 47 vjeç i cili ditën e djeshme telefonoi policinë duke i thënë se në Gjykatën e Apelit ishte një sasi lënde eksplozive.
47-vjeçari dyshohet të vuajë nga probleme të shëndetit mendor, ndërkohë që po punohet për të identifikuar dhe kapur shtetasit të cilet kanë nxitur 47 vjeçarin të kryejë këtë telefonatë të rreme.
Drejtoria e Antiterrorit ka referuar materialet për procedimin penal të këtij shtetasi për veprën penale “Përhapja e informatave të rreme që ngjallin panik”.
Njoftimi i policisë:
Tiranë
Identifikohet dhe procedohet penalisht shtetasi që telefonoi rreth orës 11:00, të datës 08.11.2022, në sallën operative të DVP Tiranë, për të njoftuar vendosjen e një sasie lënde eksplozive te Gjykata e Apelit.
Strukturat e Policisë së Shtetit, përfshirë edhe Drejtorinë e Antiterrorit, u njoftuan për vendosje të lëndës eksplozive në godinën e Gjykatës së Apelit (pa u specifikuar konkretisht në godinën e cilës gjykatë apeli).
Nga ana e strukturave të Drejtorisë së Antiterrorit u kryen veprimet e para hetimore, verifikuese dhe kontrolluese, në bashkëpunim me Njësinë Antieksploziv të Repartit Special RENEA dhe me efektivët e komisariateve të Policisë Nr. 1 dhe Nr. 3, Tiranë.
Pas tërësisë së veprimeve të kryera, në asnjë nga ambientet përreth godinave nuk u gjet lëndë eksplozive.
Në vijim të veprimeve, nga Drejtoria e Antiterrorit u referuan materialet procedurale në Prokurorinë pranë Gjykatës së Shkallës së Parë Tiranë, për veprën penale “Përhapja e informatave të rreme që ngjallin panik”, për shtetasin J. K., 47 vjeç, i dyshuar me probleme të shëndetit mendor.
Vijojnë veprimet procedurale, në bashkëpunim me Prokurorinë pranë Gjykatës së Shkallës së Parë Tiranë, për dokumentimin e plotë të kryerjes së veprës penale, identifikimin dhe kapjen e shtetasve të tjerë që dyshohet se kanë nxitur shtetasin J. K., të kryejë telefonatë të rremë në sallën operative, duke përhapur panik dhe duke vënë në alarm shërbimet policore.
