Të tjera detaje janë zbardhur në lidhje me ngjarjen e rëndë që ndodhi mëngjesin e ditës së sotme pranë shkollës “Çajupi” në kryeqytet, ku disa perona u konfliktuan me njëri-tjetrin. Ngjarja ndodhi rreth orës 08:30 në një mëngjesore.
“News24”, ka bërë të mundur zbardhjen e detajeve të reja nga vendngjarja, ku ka mësuar se sherri kishte nisur në këtë biznes mes disa personave, ndërsa më pas kishte vazhduar jashtë ambienteve të këtij biznesi. Ndonëse përplasja si fillim kishte qenë verbale, personat në fjalë nisën që të konfliktoheshin me sende të forta dhe për pasojë 4 prej tyre përfunduan me lëndime në spital. Po ashtu mësohet se një prej këtyre personave, pasi kishte kërcënuar disa herë, kishte nxjerrë një pistoletë dhe kishte qëlluar disa erë në ajër. Kjo skenë ka shkaktuar panik te banorët, ndërkohë që zona është mjaft e populluar për shkak edhe të bizneseve që gjenden përgjatë rrugës.
Fatmirësisht për parandalimin e përshkallëzimit të situatës ka ndërhyrë policia, e cila bëri dhe shoqërimin e dy personave në komisariat. Po ashtu u sekuestrua dhe arma e zjarrit. Deri më tani nuk dihen rrethanat se si ka nisur sherri i dhunshëm.
Mes të tjerash bëhet e ditur se sherri i dhunshëm nuk ka lidhje me shkollën, ndërsa ende nuk dihen shkaqet që çuan në zënkën e dhunshme. Ndërkohë, është sekuestruar një armë zjarri pistoletë, ndërsa dy persona janë shoqëruar ne komisariat. Sherri i ndodhur pranë shkollës ka krijuar panik edhe te nxënësit të cilët kanë qënë në mësim.
