Detaje të reja janë zbuluar në lidhje me vrasjen e Albert Krasniqi nga babai i tij në mes të Prishtinës. Ka qenë avokati i Skënder Krasniqit (babai i Albertit) ai që ka bërë të ditura fakte të reja nga ngjarja, i ftuar në emisionin “Shqipëria Live”.
Avokati Ramiz Krasniqi ka thënë se Skënderi nuk e ka pranuar akuzën dhe se vrasja u krye nga pakujdesia. Ai ka shtuar se bab e bir kishin të dy raporte të mira dhe se i arrestuari është në gjendje të rëndë psikologjike.
“Skëndër Krasniqi do të jetë në paraburgim një muaj,. Ai nuk e ka pranuar akuzën. Kemi kontestuar dashjen pra, që ai e vrau djalin me dashje. Si ka mundësi me dashje ta privojë nga jeta, se ata kishin raporte shumë të mira, si mund të thuash që kjo gjë u bë me dashje, Vrasja u krye nga pakujdesia,”-ka thënë avokati.
Ramiz Krasniqi gjithashtu ka konfirmuar se lajmet për mosmarrëveshjet midis Albert Krasniqit dhe ish-bashkëshortes së tij, Besa Gashi, ishin të vërteta, por sipas tij kjo nuk kishte lidhje me vrasjen. Avokati ka shtuar se në vendngjarje ka pasur kamera, gjë që do ndihmoj në vërtetimin e pretendimeve të Skënder Krasiniqit.
“Skënderi nuk ka mundur të komunikojë shumë, thotë vetëm që e kam vrarë aksidentalisht. Arma ka qenë e Albertit pa leje. Ata u takuan në garazhin e shtëpisë së Albertit. Nëse ka pasur kamera do të kuptohet më shumë, por Skënderi nuk pranon se e ka vrarë me qëllim djalin.”, ka thënë avokati.
