Detaje të reja janë mësuar në lidhje me viktimën e pestë nga koronavirusi në vendin tonë.
Pacienti prej 13 ditësh ndodhej i shtruar te spitali Infektiv, ndërsa prej 10 ditësh ndodhej në terapi intensive.
Sipas informacioneve, 49-vjeçari vuante nga diabeti mellitus, çka mund të ketë rënduar edhe gjendjen e tij.
Komplikacionet me zemrën kanë përkeqësuar situatën e tij, duke i shkaktuar edhe vdekjen.
Ai ishte një nga pacientët e parë të shtruar në spitalin Infektiv dhe dyshohet se ka pasur kontakte me babanë e pacientit zero.
Ndërkohë bilanci i COVID-19 në vendin tonë është rritur ndjeshëm.
Brenda 24 orëve janë identifikuar 19 raste të reja, nga 74 testime të kryera, duke arritur totalin e 124 të prekurve.
Harta e të prekurve është zgjeruar edhe më tej, në Lezhë, Has edhe Berat.
Në spitalin Infektiv për momentin ndodhen 57 pacientë, dy prej të cilëve në terapi intensive, ndërsa pjesa tjetër janë në gjendje të stabilizuar në pavion.
