Zjarri i rënë pasditen e së enjtes pranë kullës së Sahatit të Tiranës ka shkaktuar jo pak dëme materiale. Deri më tani policia nuk ka dalë në asnjë version sesi mund të kenë nisur flakët që kanë përfshirë godinat njëkatëshe rreth zonës.
Deri më tani pikëpyetja më e madhe që është ngritur është sesi mund të marrë flakë një godinë e pabanuar, kujt mund t’i shërbente shkrumbimi i saj? Mesa duket kjo pyetje mund të ketë një përgjigje, pasi pikërisht në këtë zonë është parashikuar ndërtimi i një godine të lartë, plotë 77 metra. Mirëpo përpos këtij fakti, ajo që është mësuar është se kjo godinë ka pasur edhe konflikt pronësie midis pronarëve të kafes së famshme të Tiranës, ‘Bar Sahatit’, disa personave që zotërojnë pronësinë e truallit dhe Bashkisë së Tiranës. Pronarët e Bar Sahatit, Dashnor dhe Flutura Doçi thonë për News24 se lokalin e famshëm e kanë privatizuar në vitin 1991 dhe në vitin 1995 kanë blerë truallin nga Bashkia e Tiranës. Ata thonë se deri në vitin 2018 kanë punuar normalisht, derisa hipoteka i ka lajmëruar se prona e tyre ka mbivendosje.
Dhe pikërisht ditën e sotme, ka shkuar pranë pronës së shumëpërfolur edhe Inspektorati i Mjedisit dhe Territorit në Bashkinë e Tiranës ka shkuar për t’i prishur objektin pa një urdhër prishjeje dhe pa lajmërim me arsyetimin se aty është dhënë leje zhvillimore.
Ajo që duhet mbajtur mend është se Sahati i Tiranës ishte monument kulture i kategorisë së parë i miratuar në vitin 1948 dhe zona përreth ishte zonë Muzeale dhe në këtë mënyrë ishte e pamundur që të ndërhyhej për të ndërtuar. Por në vitin 2018, Bashkia e Tiranës dhe Këshilli i Rregullimit të Territorit më procedura të përshpejtuara ia kanë hequr këtë status.
Mesa duket fjalët që kanë qarkulluar gjatë kohës kur flitej për prishjen e Teatrit Kombëtar kanë qenë të vërteta. Në atë kohë flitej për një partneritet të Bashkisë me një biznesmen, të cilit i është premtuar i gjithë perimetri, nga godina e Teatrit Kombëtar deri pas bashkisë. Sipas shenjave të tanishme, kjo po del e vërtetë, vetëm se planet për shembjen e Teatrit Kombëtar deri tani kanë dështuar njëra pas tjetrës.
