Ditën e sotme në Shqipëri, numri i të prekurve nga koronavirusi shkoi në 23.
Në mesin e të infektuarve ishin edhe dy persona në Elbasan.
“Dosja.al” ka mësuar, se të dy rastet e zbuluara në Elbasan, kishin pasur kontakte me 31-vjeçarin, të zbuluar në Tiranë, i cili shkoi në Milano për disa orë për të takuar dajën në spital.
Sapo ishte kthyer nga Italia, ai kishte takuar dy prindërit e tij, të cilët i ka infektuar me koronavirus.
Nisur nga kjo situatë, edhe fqinjëve i janë marë mostrat, pasi kanë pasur kontakt me çiftin e infektuar.
Pas zbulimit të rastit, i gjithë pallati është dezinfektuar, ndërsa banorët i janë nënshtruar analizave.
Që prej ditës së djeshme, në rrugët e vendit ka zbritur ushtria, e cila po evidenton personat që nuk kanë zbatuar rregullat e vetëkarantinimit.
Ndërkohë qeveria ka marrë disa masa shtrënguese, duke filluar nga mbyllja e shkollave, lokaleve dhe ndalimi i të gjitha aktiviteteve kulturore dhe sociale.
Ministria e Shëndetësisë ndërkohë ka bërë thirrje për respektimin e rregullave të higjienës dhe minimizimin e daljeve nga shtëpia.
