Detaje të reja kanë dalë në dritë në lidhje me aksidentin tragjik ku humbën jetën 3 të rinj. Mësohet se automjeti tip “Audi A8” me drejtues 20-vjeçarin Klevis Ruçaj, që ishte duke udhëtuar në unazën lindore me drejtim lëvizje nga Farka, fluturoi duke përfunduar i shkatërruar në nënkalimin e autostradës Tiranë-Elbasan.
Nga hetimi paraprak ka rezultuar se mjeti “Audi” lëvizte me shpejtësi mbi 260 km/h. Nga këqyrja e vendit të ngjarjes nga grupi hetimor në rrugën që ka përshkuar 20-vjeçari që vinte nga unaza lindore pra nga Farka drejt rrethotullimit të TEG-ut, duket që nuk ka frenim të fortë.
Në aksident ndërruan jetë në vendngjarje dy vajzat pasagjere, të identifikuara si Sikela Përroj (23 vjeçe) dhe Erisilda Abedini (22 vjeçe), ndërsa drejtuesi humbi jetën pasi u transportua në Spitalin e Traumës.
Sa i përket dy vajzave, mësohet se 23-vjeçarja Sikela Përroj jetonte e vetme në Tiranë, pasi familja e saj jeton jashtë vendit. Ajo është nga Shalësi i Cërrikut dhe ka përfunduar në vitin 2022 studimet e larta në degën e Gazetarisë, pranë fakultetit të Histori Filologjisë në Tiranë.
Ndërkohë në profilet e drejtuesit të mjetit në rrjetet sociale vihet re pasioni i tij për shpejtësinë, ku në një vidot duket teksa nget mjetin me 271 km/h.
