Një tjetër vrasje e dyfishtë ka tronditur vendin, ku dy djem xhaxhallarësh, Mikel dhe Jani Jushi kanë mbetur të vdekur si pasojë e një konflikti të ndodhur në qendër të Laçit.
Detaje të reja kanë dalë nga policia ku bëhet i ditur identiteti i autorëve të dyshuar ku bëhet fjalë për M. B., 25 vjeç, M. B., 23 vjeç dhe V. B., 28 vjeç, të tre lindur e banues në Kurbin.
Nga të dhënat e para konflikti fillimisht ka nisur në një lokal të quajtur “KF Laçi” dhe më pas viktimat janë përpjekur që të fshihen në një rrugicë, por e kanë pasur të pamundur pasi autorët i kanë gjetur dhe kanë qëlluar më armë zjarri.
Burimet nga policia bëjnë me dije se dyshimet e para janë se autorët dhe viktima kanë diskutuar prishjen e pazareve të drogës, mirëpo sipas tyre vrasja mund të ketë ndodhur edhe për motivë banale.
Ajo që duhet thënë është se lokali ku nisi ngjarja nuk është hera e parë që vendoset në qendër të vëmendjes, pasi edhe më parë ka pasur konflikte të tilla.
Sipas qytetarëve lokali është i njohur në zonë kjo sepse aty konsumohen lëndë narkotike, edhe pse si vendndodhje është shumë afër rajonit të policisë.
