Detaje të reja janë zbuluar nga atentati që ka ndodhur sot në Vlorë ku një person ka mbetur i plagosur rëndë.
Sipas pistave që është duke ndjekur hetimi, personi i cili u plagos, konrektisht Mikel Mehmeti, nga dy atentatorë të clëve ende nuk i dihet identiteti, ka qenë bashkëpunëtor i ngushtë i vëllezërve Llanaj në Vlorë.
Aktualisht 41-vjeçari ndodhet në gjendje të rëndë pasi ka marrë një plumb në kraharor dhe gjendja e tij sipas bluzave të bardha paraqitet shumë e rëndë.
Mehmetaj nuk ka qenë i vetëm në makinë, ka qenë I shoqëruar dhe dyshohet se dhe personi i dytë është plagosur, por ende policia nuk ka dhënë asnjë detaj mbi të.
Disa kilometra larg vendit të ngjarjes policia ka gjetur dhe një makinë të djegur e cila dyshohet se është e autorëve që kanë kryer atentatin.
Vëllezërit Llanaj në Vlorë janë të njohur për hasmërinë me familjen Xhaferi dhe të shumta kanë qenë vrasjet dhe atentatet e kryera mes tyre, përfshi dhe atë që është njohur si masakra e Çoles.
Konflikti mes dy fiseve
Konflikti ndërmjet fiseve Llanaj dhe Xhaferri ka nisur në vitin 1998, kur u vra me armë në Selenicë të Vlorës Gjysh Xhaferri. Baftjar Llanaj u akuzua për vrasjen e tij. Në qershor 2011 u ekzekutua Baftjar Llanaj. Policia arrestoi autorin Sako Xhaferri, djali i Gjysh Xhaferrit.
Në shtator 2011, tentohet të vritet Nihat Xhaferri, djali i viktimës Gjysh Xhaferri nga Altin Aliaj, nipi i familjes Llanaj. Altin Aliaj u la me “detyrim paraqitje” nga Gjykata. Në janar 2012 u vra në atentat Nure Xhaferri, 52 vjeç, djali tjetër i Gjysh Xhaferrit. Më 1 tetor 2017 u plagos në atentat, Ferdinand Llanaj, djali i të ndjerit Baftjar Llanaj.
Këto mbeten ende dyshime dhe asgjë nuk është e vërtetuar plotësisht.
