Pak më herët, policia njoftoi se kishte vënë në pranga 3 persona dhe kishte shpallur në kërkim 1 tjetër për vrasjen e eJurgen Kurtit.
Të arrestuarit janë: Elsi Leventi, 21 vjeç, lindur në Athinë dhe banues në Tiranë, Alesio Berberi, 33 vjeç, lindur në Patos, Olsi Qalliaj, 22 vjeç, lindur në Fier dhe banues në Patos.
Por mësohet se katër personat e përfshirë në vrasjen e Jurgen Kurtit janë miq me njëri-tjetrin, megjithë se tre të arrestuarit kanë thënë se nuk kanë pasur njohje më herët me viktimën. Ata janë arrestuar në Tiranë duke udhëtuar me makinë pasditen e djeshme.
Në polici ata nuk kanë pranuar akuzat dhe nuk kanë dhënë detaje, por mësohet se e kanë ndjekur për disa ditë Jurgen Kurtin dhe janë kapur nga kamerat e sigurisë duke udhëtuar me mjetin “Benz” që u përdor edhe ditën e vrasjes.
Policia e Tiranës nuk ka ende një motiv për këtë ngjarje, ndërsa të arrestuarit rezultojnë të papunë dhe dyshimet shtohen se ata mund të jenë të përfshirë në shpërndarje të lëndëve narkotike.
Nga ana tjetër një tjetër pistë e cila mund të qëndrojë është fakti se vrasja mund të jetë kryer edhe me pagesë, por këto janë thjesht dyshime paraprake pasi ende nuk ka një version zyrtar.
Ndërkohë është zbuluar falë rrjeteve sociale imazhi i Olsi Qalliaj. Siç duket nga fotot e publikuara në Facebook, si çdo bashkëmoshatar i tij, bën një jetë normale në qytetin e Patosit.
Por vëmendjen e tërheqin makinat luksoze, me të cilat shfaqet në fotot e publikuara në rrjetin social.
Duket se 22-vjeçari, pavarësisht se jeton në një vend të vogël, është i pasionuar pas makinave të shtrenjta dhe ka arritur që të sigurojë disa modele.
Fotot e tij janë të ndryshme, si shofer, pasagjer apo vetëm duke qëndruar pranë tyre.
Gjithashtu nga të dhënat e profilit të tij kuptojmë se, i riu ka studiuar në një gjimnaz jopublik që ndodhet në Fier, ndërsa nuk jep detaje nëse ka ndjekur më pas arsimin e lartë.
Ndërkohë ende nuk dihet roli që ka pasur Olsi në vrasjen e 26-vjeçarit Jurgen Kurti.
