Detaje të reja janë zbardhur nga krimi në familje që tronditi mëngjesin e sotëm Kosovën. Edmond Lajçi i cili është vënë në prangat e policisë ka vrarë me armë zjarri bashkëshorten e tij. Siç raportojnë mediat e Kosovës, ngjarja ka ndodhur në banesën e çiftit, në rrugën “Bill Clinton” në Pejë.
Gjithashtu mësohet se Gjyljeta Ukella, ishte prej 20 vitesh punonjëse në drejtorinë e Shëndetësisë dhe Mirëqenies Sociale në komunën e Pejës.
Kryeprokurori i Pejës, Agim Kurmehaj, ka thënë për mediat në Kosovë se çifti kanë tre fëmijë dhe se rasti është në hetim për zbardhjen e plotë të rrethanave të ngjarjes.
Theksojmë se në vetë pak ditë në Kosovë janë vrarë dy gra nga bashkëshorti dhe ish-bashkëshorti. Më 12 prill, u vra 21-vjeçarja Erona Cokli, brenda zyrës së qendrës për Punë Sociale në Ferizaj, nga ish- bashkëshorti i saj Valon Aliu.
