Detaje të reja dalin nga atentati i ndodhur në orët e para të së martës në Durrës, ku 29-vjeçari Ermir Dedja humbi jetën si pasojë e të shtënave me armë zjarri.
Burime nga policia bëjnë me dije se viktima ishte i njohur nga autoritetet dhe ishte i skeduar për përfshirje në trafik droge dhe vepra të tjera penale.
Dyshohet se Dedja kishte konflikte të mëparshme me persona të ndryshëm dhe autorët i kanë zënë pritë në orët e para të mëngjesit.
Ngjarja ka ndodhur në një zonë të mbuluar nga kamera sigurie, për shkak të pranisë së disa qendrave mjekësore private dhe laboratorëve, që lejojnë mbikëqyrje të plotë të rrugës.
Ekspertët kanë sekuestruar pamjet filmike, në shpresën se ngjarja është regjistruar.
Të shtënat shkaktuan panik mes banorëve të lagjes, të cilët ishin edhe të parët që lajmëruan policinë.
Nga hetimet paraprake, rezulton se autorët e kanë ndjekur dhe mbajtur nën vëzhgim viktimën, duke ditur me saktësi momentin kur ai do të dilte nga banesa.
Sipas raporteve, Dedja po lëvizte në këmbë në lagjen nr. 18 kur u qëllua me breshëri plumbash nga autorët e maskuar, të cilët u larguan me një makinë nga vendi i ngjarjes.
Dyshohet se një person ka vëzhguar lëvizjet e të riut dhe më pas ka sinjalizuar sulmuesit.
Sulmi ndodhi pranë një qendre shëndetësore, e cila pësoi dëmtime nga plumbat gjatë të shtënave.
