Situata politike në Kosovë duket ende e luhatshme, teksa ashpërsohen debatet në distancë mes kryeministrit në detyrë Albin Kurti dhe presidentit Hashim Thaçi.
Ditën e sotme Thaçi, nga burgu i Dobravës ku kishte shkuar për vizitë, presidenti paralajmëroi Serbinë, se derisa të vihet drejtësia në vend për viktimat, Kosova nuk do të ndalet.
“Serbia do të ballafaqohet me drejtësinë për gjenocidin që e ka kryer në Kosovë kundër popullatës civile dhe për të gjithë këto masakra që u kanë ndodhur qytetarëve të Kosovës”, tha presidenti Thaçi.
Sakaq, ai ka hedhur akuza të forta në drejtim të Kurtit duke e akuzuar për uzurpim të zyrës së kryeministrit, pas dy shkeljeve kushtetuese.
“Nuk e di sa është e rëndësishme që të dërgojmë mesazhe politike këtu, nga kjo hapësirë e burgut të Dubravës, sidoqoftë jetë juve si mediume kemi obligim të ju përgjigjemi, të jemi korrekt e transparent. Ajo çka unë mendoj është që ne të gjithë duhet të fokusohemi në respektimin e plotë të Kushtetutshmërisë dhe ligjshmërisë. Për fat të keq kemi një njeri që e ka uzurpuar zyrën e kryeministrit edhe pas dy shkeljeve të rënda kushtetuese po paraqitet dhe po sillet si njëri i paligjshëm në skenën politike”, u shpreh Thaçi.
Më tej ai shtoi, se kryeministri nuk duhet të bëjë presion ndaj Gjykatës Kushtetuese, por të pranojë dhe respektojë vendimin e këtij organi të drejtësisë.
“Unë nuk dëshiroj të komentoj fare punën e Gjykatës, edhe kur e lavdon edhe kur e mbron, edhe kur kritikohet po interpretohet në mënyrë të njëjtë, nuk është e drejtë, ta lëmë rahat Gjykatën ndërsa sa i përket rrugëtimit të mëtutjeshëm varet nga vendimi i Kushtetueses, si president e kam marrë vendimin për dekretim duke u bazuar në Kushtetutë por edhe opinionit që kanë treguar shumica e partive”, ka thënë ai.
Pas këtyre deklaratve ka reguar edhe kreu i Vetëvendosjes, i cili me anë të një statusi në Facebook, kërkon zgjedhje në muajt e ardhshëm, ndërkohë që Gjykata Kushtetuese pas 5 ditësh vendos nëse qeveria e re LDK- AAK- është legjitime apo jo.
Kurti thotë se Kosova po ia del me koronavirusin dhe duhen zgjedhje si në Europë pasi po vendoset në pikëpyetje demokracia, teksa shton se nuk ka ngërç institucional në Kosovë, por vetëm mospajtime që kanë zgjidhje, dhe zgjidhja sipas Kurtit janë zgjedhjet e parakohshme.
STATUSI NGA ALBIN KURTI
Ngërçi institucional shfaqet vetëm kur përjashton zgjedhjet
Sot u bënë dy muaj nga mocioni i mosbesimit. Më 25 mars krizës shëndetësore iu pat shtuar edhe ajo politike. Mirëpo, ne po ia dalim. Dje ishte dita e parë, që nga 13 marsi, pa të infektuar me virusin Corona. Ngërç institucional? Nuk është e vërtetë. Mospajtime ka, por edhe zgjidhje ka. Në përputhje me Kushtetutën tonë nevojiten zgjedhje të reja. Ato tashmë po mbahen anembanë Evropës. Pas shëndetit të popullsisë dhe ekonomisë, është në pyetje edhe shëndeti i demokracisë. Zgjedhje do të ketë në qershor në Islandë, Francë dhe Serbi, kurse në korrik në Maqedoninë e Veriut, Spanjë dhe Kroaci. Duhet të kemi zgjedhje edhe në Kosovë e aso lokale në Podujevë. Madje, mundet edhe njëkohësisht.
https://www.facebook.com/albini2017/posts/878833002616585
Kujtojmë se më 30 prill, presidenti i Kosovës Hashim Thaçi dekretoi kandidatin e Lidhjes Demokratike të Kosovës, Avdullah Hoti, për pozitën e kryeministrit të ardhshëm të Kosovës.
Në po të njëjtën ditë, Lëvizja Vetëvendosje i është drejtuar Gjykatës Kushtetuese me pretendimin se presidenti ka marrë vendim kundërkushtetues.
Gjykata Kushtetuese ka vendosur masë të përkohshme deri më 29 maj duke pezulluar deri në një vendim të plotë dekretin e presidentit Hashim Thaçi për të mandatuar Avdullah Hotin e Lidhjes Demokratike të Kosovës për kryeministër.
