Seanca që ishte caktuar për këtë të enjte në Gjykatën e Posaçme Kundër Korrupsionit dhe Krimit të Organizuar për çështjen “Plumbi i Artë” është shtyrë për në 17 qershor, ora 10:00, për shkak të mungesës së disa avokatëve mbrojtës.
Me kërkesë të Prokurorisë së Posaçme, gjykata vendosi pezullimin e afateve të paraburgimit për të gjithë të pandehurit deri në seancën e radhës.
Në seancën e parashikuar do të dëshmonte bashkëpunëtori i drejtësisë, Erjon Alibej, i cili ka pranuar të bashkëpunojë me autoritetet pas arrestimit për një sërë veprash të rënda.
Ai akuzohet si kreu i një grupi kriminal të njohur në Elbasan dhe është nën hetim për trafik ndërkombëtar droge dhe porositje atentatesh me motive hakmarrjeje.
Në rrëfimin e tij para gjykatës, Alibej ka zbuluar detaje për përfshirjen në trafikun e kokainës dhe lidhjet me figura të botës së krimit.
Ai akuzoi vëllezërit Franc dhe Hajdar Çopja, si dhe Suel Çelën, me të cilët më parë kishte marrëdhënie të ngushta, për përfshirje në vrasjen e vëllait të tij, Endrit Alibej, gjatë ngjarjes së vitit 2020, e njohur si “Masakra e Bradasheshit”, ku u vranë gjithashtu Arben Dylgjeri dhe shtetasi turk Erdal Durunay.
