Procesi i konstituimit të Kuvendit të Kosovës ka dështuar për herë të 43-të, duke zgjatur edhe më tej ngërçin institucional në vend.
As në këtë seancë, deputetët nuk arritën të krijojnë Komisionin Zgjedhor për zgjedhjen e kryetarit të Kuvendit.
Nga 99 deputetë të pranishëm, vetëm 55 votuan pro, ndërsa pjesa tjetër nuk mori fare pjesë në votim, duke mos rezultuar as abstenime e as vota kundër.
Seanca u drejtua nga kryesuesi Avni Dehari, i cili njoftoi se përpjekja e radhës për konstituimin e Kuvendit do të zhvillohet të mërkurën, më 9 korrik, në orën 11:00.
Sërish, disa nga subjektet kryesore politike Partia Demokratike e Kosovës, Lidhja Demokratike e Kosovës, Lista Serbe, Aleanca për Ardhmërinë e Kosovës dhe NISMA, nuk propozuan emra për anëtarë të komisionit.
Ndërkohë, Lëvizja Vetëvendosje, si forca më e madhe parlamentare, ka propozuar Albulena Haxhiun për kryetare të Kuvendit, duke këmbëngulur që procesi i votimit të zhvillohet në mënyrë të fshehtë. Por edhe kjo iniciativë nuk mjaftoi për të zhbllokuar situatën.
Dështimi i njëpasnjëshëm për të konstituuar Kuvendin reflekton përçarjen e thellë mes partive politike dhe mungesën e një vullneti të përbashkët për të dalë nga kriza.
Analistët politikë paralajmërojnë se kjo bllokadë e zgjatur rrezikon jo vetëm funksionimin e institucioneve, por edhe vetë stabilitetin demokratik të Kosovës.
Gjykata Kushtetuese ka ndërhyrë më 26 qershor përmes një aktgjykimi që detyron deputetët të konstituojnë Kuvendin brenda 30 ditësh.
Megjithatë, vendimi nuk specifikon se cilat do të jenë pasojat nëse ky afat shkelet, duke lënë një vakum të rrezikshëm juridik në një moment kritik për funksionimin e shtetit.
