Pas diskutimeve të gjata në lidhje me Reformën Territoriale dhe kërkesës së demokratëve për një ndryshim të numrit të bashkive, duket se Partia Socialiste nuk dorëhiqet nga numri 61 i bashkive. PS ka deklaruar paraditen e kësaj të hëne se në zgjedhjet vendore do të votohet në 61 bashki, pra se nuk do të ketë asnjë ndryshim në ndarjen territoriale. Kreu i grupit parlamentar të Partisë Socialiste, Taulant Balla i pyetur nga gazetarët në lidhje me raportet e komisionit të posaçëm të reformës administrative territoriale u shpreh se nuk pati konsensus për të shkuar në ndryshime ligjore. Në komision Partia Demokratike doli me propozime kërkuan shtimin me 33 bashki, pra 94 bashki në total, nga 61 që janë aktualisht.
“Komisionet e Posaçme ndryshojnë nga komisionet hetimore. Komisionet e posaçme votojnë projektligjet që burojnë nga puna e tyre. Në komisionin e posaçëm të reformës administrative territoriale nuk pati konsensus për të shkuar në ndryshime legjislative. Raportet e tyre janë administruar si raporte të maxhorancës dhe opozitës dhe kjo është një çështjes e mbyllur. Nuk do ketë votim raportesh. Do kishte votim nëse do kishte amendamente në ligjin për reformën administrative territoriale. Nuk ka më kohë për këtë çështjes (negociata). Më 14 maj në Shqipëri do votohet në 61 bashki”, deklaroi Balla.
