Deputetët e Kuvendit të Kosovës kanë dështuar për të 44-tën herë radhazi të konstituojnë përbërjen e re parlamentare, të dalë nga zgjedhjet e mbajtura në muajin shkurt.
Seanca e së mërkurës, më 9 korrik, përfundoi sërish pa sukses, pasi partitë opozitare refuzuan të marrin pjesë në formimin e komisionit të përkohshëm që do të mbikëqyrte votimin e fshehtë për zgjedhjen e kryeparlamentarit.
Partia Demokratike e Kosovës, Lidhja Demokratike e Kosovës, Aleanca për Ardhmërinë e Kosovës dhe Lista Serbe, në vazhdimësi kanë kundërshtuar kërkesën e Lëvizjes Vetëvendosje që zgjedhja e kryetarit të Kuvendit të bëhet me votim të fshehtë.
Opozita e konsideron këtë praktikë jokushtetuese, ndërsa Vetëvendosje këmbëngul se është legjitime dhe brenda kuadrit të rregullores parlamentare.
Deri tani, Kuvendi i ri ka kaluar vetëm dy nga pikat e rendit të ditës: miratimin e raportit të Komisionit të përkohshëm për verifikimin e mandateve dhe betimin e deputetëve. Ngërçi vazhdon në pikën e tretë, zgjedhja e kryetarit të Kuvendit.
Kandidatja e Vetëvendosjes për kryeparlamentare, Albulena Haxhiu, ka dështuar në disa votime të hapura të sigurojë shumicën e nevojshme prej 61 votash. PDK dhe AAK e kanë konsideruar Haxhiun si një figurë përçarëse, ndërsa kanë kërkuar që LVV të propozojë një tjetër emër. LDK nga ana tjetër ka deklaruar se nuk do të japë votën për asnjë kandidat të Vetëvendosjes për këtë post.
Për konstituimin e plotë të Kuvendit kërkohet zgjedhja e kryetarit dhe pesë nënkryetarëve. Vetëm pas kësaj procedure mund të hidhet hapi drejt formimit të Qeverisë së re.
Seanca e radhës është parashikuar të zhvillohet të premten, më 11 korrik.
