Shërbimi i sterilizimit të pajisjeve mjekësore, një nga koncesionet më të debatueshme në shëndetësi, ka kaluar në administrim shtetëror pas përfundimit të kontratës me privatin. Por, sipas një hulumtimi të Vox News, menjëherë pas këtij kalimi janë konstatuar probleme në pajisje dhe në funksionimin e shërbimit, duke krijuar boshllëqe që kanë detyruar ndërhyrje të menjëhershme.
Për të mbuluar këto mungesa, kompania shtetërore “Operatori i Shërbimeve të Integruara të Sterilizimit”, e krijuar në janar 2026 nga ministrja e Shëndetësisë Evis Sala, ka hapur 15 procedura prokurimi brenda një periudhe të shkurtër. Sipas Vox News, pjesa më e madhe e këtyre tenderave janë realizuar me negocim, pra pa garë.
Në total, sipas përllogaritjeve të Vox News, Ministria e Shëndetësisë pritet të shpenzojë 481.378.506 lekë, ose rreth 5 milionë euro. Shuma më e madhe, 216 milionë lekë, shkon për materiale sterile dhe veshje njëpërdorimshme për sallat kirurgjikale, ndërsa 96 milionë lekë për transportin e seteve dhe menaxhimin e mbetjeve të rrezikshme spitalore.
Shpenzime të tjera përfshijnë 82 milionë lekë për materiale shtesë sterile, 24 milionë lekë për transport materialesh, 25 milionë lekë për karburant, 9 milionë lekë për mirëmbajtjen e pajisjeve mjekësore dhe 7.2 milionë lekë për transport urban. Ndërkohë, 8.5 milionë lekë janë parashikuar për sistemet e menaxhimit, si dhe fonde për shërbime bazë si internet, ujë dhe uniforma për stafin.
Ky zhvillim vjen pas përfundimit të koncesionit të dhënë në vitin 2015 kompanisë “Sani Service”, një kontratë 10-vjeçare që i kushtoi shtetit rreth 120 milionë euro. Sipas të dhënave të publikuara më herët nga Vox News, kompania deklaronte rreth 18 milionë euro të ardhura në vit nga fondet publike.
Ndërkohë, çështja e këtij koncesioni është nën hetim nga SPAK, i cili në vitin 2023 lëshoi 8 urdhër-arreste për zyrtarë dhe përfaqësues të kompanisë, të akuzuar për shpërdorim detyre, falsifikim dokumentesh dhe korrupsion. Hetimet kanë zbuluar se studimi i fizibilitetit ishte bazuar në të dhëna të pasakta dhe se mungonte kontrata origjinale në arkiva.
Kalimi i shërbimit në duart e shtetit dhe hapja e menjëhershme e tenderave pa garë ka rikthyer vëmendjen te mënyra e menaxhimit të fondeve publike në shëndetësi.
