Një ngjarje e rëndë me protagonist një kosovar 48-vjeçar ka tronditur Gjermaninë. Një burrë 48 vjeç, nga Ferizaj, mbrëmjen e së shtunës e ka vrarë kunatën dhe ka lënë të plagosur rëndë vëllain e tij në Gjermani. Për rastin tragjik dëshmitarë ishin fëmijët që panë krejt se çka ka ndodhur. Tashmë është zbardhur edhe dëshmia e fqinjëve.
Kunata e tij ishte 33 vjeçe ndërsa vëllai 38 vjeç. Gruaja, raportohet se vdiq rrugës për në spital. Ngjarja tragjike ka ndodhur në Lohne të Bielefeldit.
Mediat gjermane raportojnë se i dyshuari kishte shkuar tek ish-banesa e familjes së tij, ku kishte takuar edhe vëllain me gruan e tij që kishin shkuar për vizitë.
48-vjeçari kishte tentuar të hyjë brenda banesës, por nuk ishte lënë nga i vëllai. Më pas ai u kthye dhe mori armën me të cilën bëri aktin tragjik. Dëshmitarë të ngjarjes së rëndë ishin disa fëmijë të moshës nga 13 deri në 18 vjeç.
Një fqinj i familjes që jetonte një kat më poshtë, kishte dalë për të parë se ç’po ndodhte. Ai pa fëmijët që ishin të tronditur dhe që bërtisnin. Me këtë rast i mori nën mbrojtje fëmijët, duke i thirrur edhe policinë, ambulancën dhe ekipet e tjera të shpëtimit.
Njëri nga fëmijët e tij ia mori armën nga duart dhe e hodhi jashtë ndërtesës. Aktualisht fëmijët po marrin trajtime psikologjike si pasojë e tronditjes nga ngjarja. 48-vjeçari nga Kosova u arrestua nga policia. Po ashtu, në momentin e arrestimit edhe i dyshuari ishte plagosur rëndë. Akoma mbeten të paqarta rrethanat se si është plagosur.
Tashmë është zbardhur edhe dëshmia e fqinjit që ka marrë në mbrojtje fëmijët.
“Dëgjova dy të shtëna dhe gati sa nuk rashë nga karrigia ime. Fëmijët bërtisnin me të madhe. Në atë moment unë thjesht reagova dhe thirra punëtorët e shpëtimit. Kur zbrita në korridor, fëmijët erdhën duke bërtitur drejt meje. Ai u çmend plotësisht. Fëmijët duhet të jenë përleshur me të dhe ia kanë hedhur armën në oborrin para shtëpisë”, ka thënë ai.
Disa mjekë të urgjencës dhe punëtorë të shpëtimit u kujdesën për të plagosurit. Gruaja me sa duket vdiq gjatë rrugës për në spital. Vëllai gjithashtu pësoi një plagë me armë zjarri. Në mbrëmje u tha se jeta e tij nuk ishte në rrezik.
/GazetaReforma.com/
