Teksa Këshilli i Ministrave vendosi ditën e djeshme që studentët e Mjekësisë duhet të punojnë deri në 5 vite në Shqipëri si kusht për të marrë diplomën, këta të fundit janë ngritur ditën e sotme në protestë.
Studentët u mblodhën në oborrin e fakultetit, pranë rektoratit dhe më pas nisën marshimin drejt Kuvendit.
Ndërkohë që në Kuvend po diskutohet për këtë çështje, madje u votua me shumicë votash që të kalojë me proedurë të përshpjetuar.
“Bashkohuni me ne!”, me këto thirrje e nisën marshimin e tyre studentët, duke vijuar; “E duam Mjekësinë si gjithë Europa” apo dhe “Anuloni vendimin, zero kompromis!”.
Studentët e Mjekësisë kanë bërë thirrje për arsim cilësor teksa marshojnë kundër vendimit të qeverisë që nuk i lejon të largohen nga vendi.
“Qeveria e turpit”, “E duam mjekësinë si gjithë Evropa”, dëgjohen studentët duke thirrur teksa marshojnë nga Universiteti i Mjekësisë drejt Kuvendit, duke bllokuar njërin aks të rrugës. Ata kanë paralajmëruar që nëse nuk dëgjohen thirrjt e tyre protestat do të përshkallëzohen.
Forca policie po i shoqërojnë studentët gjatë marshimit të tyre. Ndërkohë studentëve të Mjekësisë iu janë bashkuar edhe ata të UBT-së.
Kjo është protesta e tretë e studentëve të mjekësisë që protestojnë kundër vendimit për t’i mbajtur në vend 5 vite pas përfundimit të studimeve.
