Një zjarr i përmasave të konsiderueshme ka përfshirë tregun e rrobave të përdorura në zonën e 5 Majit në Tiranë, duke shkaktuar dëme të mëdha materiale. Flakët u përhapën me shpejtësi mes tezgave, ndërsa tymi i dendur krijoi panik te tregtarët dhe qytetarët e pranishëm.
Në vendngjarje mbërritën menjëherë forcat zjarrfikëse, të cilat po punojnë për shuarjen e flakëve dhe izolimin e zjarrit, me qëllim parandalimin e përhapjes në zonat përreth. Deri më tani nuk raportohet për persona të lënduar, ndërsa dëmet materiale pritet të jenë të konsiderueshme.
Shkaqet e rënies së zjarrit mbeten ende të paqarta, ndërkohë që autoritetet kanë nisur hetimet për zbardhjen e plotë të ngjarjes.
Deputeti Erald Kapri ka hedhur dyshime se zjarri mund të jetë i qëllimshëm dhe i lidhur me plane ndërtimi. Sipas tij, “dikush e ka piketuar për ndërtime kullash”.
“Disa tregtarë po më shkruajnë se tregut te ‘5 Maji’ i është vënë flaka qëllimisht, sepse është gati një projekt me pallate. Bizneset që kishin ambientet me qira nuk ‘po hapnin rrugë’. Ky do të ishte barbarizëm. E kanë kthyer në stil djegien kur dikush nuk pranon të lërë tokën e vet, shtëpinë e vet, për t’ia dhënë për ndërtim betonizuesve të Tiranës”, shprehet deputeti Kapri.
