Deputeti i Partisë Demokratike, Asllan Dogjani, ka qenë sot për të tretën herë në Prokurorinë e Posaçme, ku është thirrur në kuadër të një hetimi për mosdeklarim pasurie.
Në një deklaratë për mediat, Dogjani sqaroi se hetimi lidhet me një shtëpi që ai ka blerë, për të cilën Kadastra ka anuluar legalizimin pasi është ndërruar drejtori i institucionit dhe tani kufizohet përdorimi i pronës për 99 vjet.
Ai shtoi se ka ardhur për të denoncuar korrupsionin dhe për të shpjeguar se si një individ, që e quan “mashtrues”, ka vazhduar të përdorë pasurinë publike për interesa personale, duke abuzuar me kopshtin dhe pjesë të tjera të pallatit.
Dogjani theksoi se një nga pronarët e truallit ka 100 mijë euro borxh që i detyrohet dhe se një tjetër ka qenë detyruar të largohet nga shtëpia dhe tani banon me qira.
Ai shprehu shqetësimin se, si deputet, nuk ka mundur të gjejë zgjidhje për këtë çështje për shkak të mos reagimit të shtetit. Dogjani theksoi se në një vend tjetër, një deputet që denoncon korrupsionin do të duhej të merrte mbështetje nga shteti, përndryshe ai do të përballohej me akuzat për kallëzim të rremë.
