Protesta e opozitës në Tiranë këtë të hënë ka kaluar në përplasje të dhunshme mes mbështetësve të opozitës dhe forcave të policisë. Pas disa thirrjeve nga ana e policisë për të liruar rrugët, autoritetet përdorën autobotin me ujë për të shpërndarë protestuesit që kishin bllokuar zonën përpara Bashkisë së Tiranës.
Përplasje fizike ka ndodhur edhe në rrethrrotullimin e Sheshit Wilson, ku deputetët e Partisë Demokratike janë përfshirë në konfrontime me policinë.
Deputeti Gazment Bardhi është filmuar duke i drejtuar fjalë të ashpra efektivëve të policisë, duke kërkuar që ata të zbatojnë ligjin dhe të mos përdorin forcë kundër protestuesve.
Situata u pasua me përplasje të tjera fizike, ku deputetët Bledion Nallbati dhe Eno Bozdo u përfshinë në një konfrontim me uniformat blu, të cilët po përpiqeshin të shpërndanin turmën.
Përplasje verbale u zhvillua gjithashtu mes deputetit Oerd Bylykbashi dhe dy punonjësve civilë të policisë në rrethrrotullimin e Zogut të Zi. Bylykbashi kërkoi të dinte emrin e personit që kishte shoqëruar protestuesit, duke e akuzuar policinë për shkelje të ligjit dhe duke paralajmëruar se do të merrej me ta.
Një tjetër moment tensioni ka ndodhur me ish-deputetin Luciano Boçi, i cili u përfshi në një përplasje fizike me efektivët e policisë.
Boçi u drejtua me fjalë të ashpra ndaj forcave të rendit, duke kërkuar që ata të largoheshin dhe të mos pengonin zhvillimin e protestës. Ky incident ka shtuar më tej tensionet në protestën e opozitës, e cila ka degjeneruar në dhunë dhe konfrontime të përsëritura gjatë gjithë zhvillimeve.
