Dy motrat që denoncuan vdekjen e babait të tyre në spitalin Infektiv do të përocedohen penalisht për përhapje të informacioneve të rreme për mjeken e QSUT, Migena Qato.
Ditën e djeshme dy motrat denoncuan vdekjen e të atit Rifat Lalo, duke thënë se ai nuk kishte marrë shërbimin e nevojshëm, por ishte lënë në një karrige në ambientet e spitalit infektiv. Ato thanë se para se të vdiste, babait të tyre nuk i ishte bërë as skaneri dhe bënë thirrje që njerëzit mos t’i sjellin të afërmit e tyre në spital. QSUT reagoi më vonë duke i mohuar akuzat e duke thënë se pacientit i ishte bërë skaneri.
Me sa duket, shteti shqiptar nuk mjaftohet me vrasjen që i bën njerëzve nëpërmjet neglizhencës në spitale, por edhe nëse guxon të flasësh të procedojnë penalisht. Sipas njoftimit të policisë janë motrat ato që kanë përhapur infermacione të rreme, ndërsa situata në spitale është mëse normale. Në fakt krejt e kundërta po ndodh, ndërsa shtretërit janë ezauruar dhe në disa nga spitalet COVID nuk pranohen më pacientë.
NJOFTIMI ZYRTAR
Specialistët e Komisariatit të Policisë Nr. 4 filluan procedimin penal ndaj shtetaseve E. L. dhe I. L., sepse nëpërmjet rrjeteve sociale dhe medias së shkruar, kanë përhapur informacione të rreme për shtetasen M. Q., me detyrë mjeke. Punohet për sqarimin e rrethanave të ngjarjes.
Materialet i kaluan Prokurorisë së Rrethit Gjyqësor Tiranë, për veprime të mëtejshme.
Për rastin në fjalë ka reaguar edhe presidenti Ilir Meta i cili ka thënë se skandalet duhet të hetohen deri në fund dhe prokuroria nuk duhet të keqpërdoret.
Reagimi i Metës:
Humbja e jetës së qytetarit të ndjerë Rifat Lalo në Spitalin Covid 1, i braktisur pa kujdesin e domosdoshëm shëndetësor sipas denoncimit të familjarëve, është një ngjarje thellësisht tronditëse.
Duke ju shprehur ngushëllimet më të ndjera familjarëve të tij, ndaj me ta dhembjen e madhe për humben e jetës së të afërmit të tyre.
Të humbasësh babain dhe të mos lihesh i qetë t`i japësh lamtumirën, se të duhet të përballesh me presionin dhe marrjet në pyetje të Policisë së Shtetit, është një qasje edhe më e tmerrshme çnjerëzore, një formë e re e dhunimit të çdo lloj norme morale dhe të drejtash të njeriut, që nuk mund të tolerohen në një shtet demokratik.
Në vazhdën e ngjarjeve, që janë bërë publike mbi trajtimin e të infektuarve me COVID-19 në ambientet spitalore, edhe pretendimi më i vogël, duhet të trajtohet me seriozitet dhe përgjegjshmëri, me objektivitet e paanshmëri nga organi i Prokurorisë, por jo nga Policia e Shtetit, që i bëj thirrje të mos keqpërdoret.
Organet ligjzbatuese, duhet të hetojnë pse spitalet nuk kanë pajisjet e nevojshme mjekësore, pse kontratat koncesionare të diagnostifikimit në shëndetësi nuk u shfrytëzuan për përballimin e pandemisë, si janë realizuar të gjitha tenderimet sekrete ose jo në shëndetësi dhe pse Ministria e Shëndetësisë e Qeveria nuk kanë ndërmarrë veprime konkrete për blerjen e pajisjeve jetëshpëtuese ECMO, për të ulur nivelin e vdekshmërisë të të sëmurëve, që intubohen.
Këto skandale e shumë të tjera duhen hetuar deri në fund, por jo qytetarët, të cilët vajtojnë të afërmit e tyre, që kanë ndërruar jetë.
Familja Lalo të lihet e qetë të vajtojë humbjen e njeriut të saj të dashur.
Ndërsa çdo institucion shtetëror të ushtrojë funksionet pa cenuar dinjitetin dhe personalitetin njerëzor, si dhe të dëshmojë mbështetjeje e solidaritet me qytetarët, që po vuajnë në këtë kohë pandemie.
Çdo sjellje tjetër, që shkon deri në makabritet nuk do harrohet dhe nuk do të amnistohet, por do ndëshkohet rëndë në referendumin historik të 25 prillit 2021 dhe pas kësaj date.
