Amarildo Hoxha, një tregtar fruta perimesh nga qyteti i Elbasanit, denoncoi në Syri Televizion ngjarjen e rëndë të dhunimit të tij fizik nga efektiv të policisë së Lushnjes.
Qytetari tregon se një nga policët i ka kërkuar dokumentat e makinës, ndërsa i ka kërkuar të ndërpriste një video live që ishte duke kryer në rrejtet sociale.
Por qytetari ka refuzuar të ndërpres videon, cka sipas tij, bëri që një nga policët ta godiste me grushte. Më pas, efektivi që e ka goditur i ka marrë makinën, ndërsa kolegët e tij e kanë future qytetarin nga Elbasani në një mjet policie duke vijuar dhunimin deri në komisariatin e Lushnjes. Amarildo Hoxha, ndonëse me fraktura dhe plagë të rënda është mbajtur deri në orën 3 pasdite në komisariat, ndërsa policia nuk ka njoftuar as familjarët.
Vetëm pas disa orësh qëndim në komisariat, Amarildo është marrë nga prindërit e tij dhe është dërguar në spital për mjekim.
Ndërkohë Policia e Shtetit ka reaguar zyrtarisht duke thene që Amarildo Hoxha nuk pranoi të japë dokumentin e identifikimit dhe ka fyer forcat policore.
DVP Fier/Sqarim
Në lidhje me pretendimet e shtetasit A. H., të bëra publike në media, ku akuzon punonjësit e Policisë Lushnjë, për dhunë të ushtruar ndaj tij, sqarojmë opinionin publik se:
Në kuadër të masave të marra për kapjen e autorëve të vrasjes së ndodhur në orët e mbrëmjes së datës 23.10.2021, në qytetin e Fierit, shërbimet e Komisariatit të Policisë Lushnjë kishin ngritur pikë kontrolli në vendin e quajtur “Rotondo e Savrës”, Lushnjë.
Thuhet se forcat policore kanë bërë shoërimin e Hoxhës me forcë drejt komisiaratit.
Rreth orës 04:40 të mëngjesit të datës 24.10.2021, kanë ndaluar mjetin me targa AA 935 CR ( me drejtues të identifikuar më pas si shtetasi A. H., 28 vjeç, banues në Drenovicë, Berat), i cili ka refuzuar të japë dokumentet e identifikimit, duke fyer dhe kanosur për jetën efektivët e Policisë.
Shërbimet e Policisë kanë bërë shoqërimin forcërisht të shtetasit A. H., në Komisariatin e Policisë Lushnjë.
Duke qenë se edhe shërbimet e Policisë edhe shtetasi i shoqëruar kanë patur pretendimet respektive, është njoftuar Prokuroria e Rrethit Gjyqësor Lushnjë, e cila ka vënë në dispozicion një oficer të Policisë Gjyqësore të Prokurorisë, për të kryer veprimet.
Nga ana e oficerit të Policisë Gjyqësore të Prokurorisë janë administruar kallëzimet e punonjësve të Policisë, kallëzimi i shtetasit A. H., këqyrja dhe vendimi i ekspertimit mjeko-ligjor për shtetasin A. H.
Në përfundim të veprimeve procedurale, oficeri i Prokurorisë së Rrethit Gjyqësor Lushnjë ka komunikuar me Sallën e Komandimit pranë Komisariatit të Policisë Lushnjë, për të komunikuar veprimet hetimore dhe hetimin e këtij personi në gjendje të lirë.
Në lidhje me këtë rast, Drejtori i Përgjithshëm i Policisë së Shtetit ka urdhëruar Drejtorinë e Standardeve Profesionale, për të dërguar një grup pune në Komisariatin e Policisë Lushnjë, me qëllim verifikimin e rastit dhe nisjen e hetimit disiplinor në rast se konstatohet tejkalim i kompetencave të punonjësve të Policisë në kryerjen e detyrës.
Policia e Shtetit është e angazhuar maksimalisht për të luftuar krimin dhe për t’u ofruar qytetarëve një shërbim sa më cilësor dhe në këtë kuadër nuk do të tolerojë asnjë punonjës policie që do abuzojë me detyrën, dhe me forcën e ligjit do veprojë ndaj çdo individi që cenon ligjin apo integritetin fizik të punonjësve të Policisë.
