Kur ka mbetur më pak se një muaj nga zgjedhjet e 25 prillit, kanë nisur indiciet e para për blerjen e votës. Kandidati i Partisë Demokratike për Tiranën, Beluind Këlliçi ka deklaruar se ka marrë dhjetra ankesa nga qytetarët se drejtori i Zjarrfikëses, Shkëlqim Goxhaj është duke shpërndarë para në Kombinat në këmbim të votave të qytetarëve.
Këlliçi i bën thirrje Goxhajt që të respektojë uniformën e shtetit dhe të mos shfrytëzojë funskionin public për interest e partisë. Më tej kandidati i PD shkruan se pas 25 prillit, Goxhaj apo kushdo që paguhet me taksat e shqiptarëve dhe shfrytëzon postin për përfitime elektorale, do të përballet me focën e ligjit dhe veprat e tyre nuk do të harrohen.
Postimi i plotë i Këlliçit:
Po marr dhjetra ankesa nga qytetarë, për përfshirjen e drejtorit të PMNZSH Zjarrfikëse Shkëlqim Goxhaj, në shpërndarje parash në zonën e pallateve Çabej.
I bëj thirrje Z. Goxhaj të respektojë uniformën e shtetit dhe të mos shfrytëzojë funksionin publik që ka, për interes partiak.
Pas 25 prillit, Shkëlqim Goxhaj dhe cilido zyrtar tjetër që paguhet me paratë e taksapaguesve shqiptarë, dhe që shfrytëzon funksionet publike për qëllime elektorale, do të përballet me forcën më të madhe të ligjit.
Jua njohim fytyrat dhe veprat. Nuk ju harrojmë!
