Presidenti Ilir Meta ka reaguar për dhunimin e gazetarit të News 24, Ergys Gjençaj gjatë aksionit anti-drogë të policisë ditën e sotme në afërsi të Shkollës së Bashkuar.
Meta shkruan se e dënon me forcë dhunën arbitrare të punonjësve të policisë ndaj gazetarit që ishte në krye të detyrës.
Presidenti thotë se ky është rast i përsëritur i cenimit fizik të reporterëve dhe meriton ndëshkim ligjor. Meta thekson se liria e medias është thelbësore për demokracinë dhe integrimin e Shqipërisë në Bashkimin Europian.
Reagimi i plotë:
Dënoj me forcë dhunën arbitrare të punonjësve të Policisë së Shtetit ndaj gazetarit të “News 24”, Ergys Gjençaj, i cili ishte në krye të detyrës dhe që gjithmonë ka dëshmuar profesionalizëm të lartë për informimin publik.
Ky rast i përsëritur i cënimit fizik të reporterëve meriton ndëshkim ligjor dhe është një tjetër incident i rëndë, që dëshmon se përdorimi i pajustifikuar i dhunës, veçanërisht ndaj përfaqësuesve të medias, është kthyer në një mentalitet shqetësues në radhët e Policisë, që duhet trajtuar me zero tolerancë, në përputhje me ligjin.
Duke shprehur solidaritetin dhe mbështetjen e plotë për të gjithë gazetarët kurajozë dhe të pavarur, theksoj se liria e medias është thelbësore për demokracinë dhe integrimin e Shqipërisë në Bashkimin Europian.
