Është dënuar me burgim të përjetshëm Aleksandër Pemaj, i njohur ndryshe me nofkën “Jimmy”. Ai organizonte transportin e kokainës nga vendi i Amerikës Latine drejt Greqisë. Bëhet fjalë për 1.2 ton kokainë nga ishulli St.Vincent drejt shtetit të Ballkanit.
Shqiptari u arrestua së bashku me katër të tjerë në kuadër të një operacioni të policisë Kolumbiane në bashkëpunim me DEA-n amerikane.
Në pranga ranë gjithashtu edhe William Cruz Pérez i cili koordinonte blerjen dhe magazinimin e kokainës dhe ishte përgjegjës për krijimin e vendeve për dorëzimin e parave.
Po ashtu u arrestua Pedro Antonio Penagos Londoño, që kishte përgjegjësi të merrte drogën në aeroport; Jairo Fernando Cardona López që akuzohet se kishte kontakte me kontrollorët ajrorë dhe punonjësit e sigurisë në terminale për të lejuar kalimin e drogës; Edwin Durlandy Montilla González që dyshohet si bashkëpunëtor i ngushtë i personave të përmendur më sipër.
Ndërkohë, mësohet se sasia e kokainës arrinte në vlerën 50 milionë euro dhe ishte gati për t’u hedhur në treg në Afrikën Perëndimore dhe në Europë, por u kap në një banesë në Greqi. Shqiptari që merrej me organizimin e transportit nuk është një emër i panjohur për drejtësinë greke, pasi është përfshirë në një përplasje me armë me këta të fundit në lagjen Virona në Athinë. Protagonist ishin edhe Marjan Koli dhe Nikolla Todi, i pari u kap në kufi, ndërsa i dyti u ekzekutua në vend.
