Fakti që ekonomia botërore do kalojë një krizë të thellë dhe shumë vende do pësojnë rënie të mëdha si pasojë e Covid-19, është tashmë i pashmangshëm.
Drejtori i Përgjithshëm i Organizatës Botërore të Tregtisë ka paralajmëruar se pandemia mund të shkaktojnë recesionin më të thellë të përjetuar ndonjëherë, duke shtuar se bota duhet të synojë shfrytëzimin sa më shumë të mundet të të gjithë nxitësve ekonomikë në zhvillimin e qëndrueshëm për zmbrapsjen e situatës.
Edhe vendi ynë, ndonëse po e përballon mirë situatën e koronavirusit, do përballet me probleme të mëdha, teksa sipas Bankës Botërore pritet të humbasë 1,4 për qind të Prodhimit të Brendshëm Bruto.
Borxhi publik pritet të rritet mbi 70% të PBB në vitin 2020, teksa defiçti do të rritet në 3,9 për qind të PBB, si pasojë e të ardhurave të pakta për shkak të pandemisë dhe mbështetja financiare e dhënë për rindertimin pas tërmetit të 26 nëntorti të vitit të shkuar.
Mbrëmjen e sotme, Arben Ahmetaj deklaroi se dëmi ekonomik që do të pësojë Shqipëria për shkak të situatës së krijuar nga Covid-19, parashikohet të jetë më shumë se 1 miliardë dollarë, ndërsa pohoi që sektori më i prekur do të jetë ai i prodhimit.
“Dëmi ekonomik këtë vit mund të shkojë përreth minus 5 përqind. Nëse do e transmetoja në shifra të prodhimit të brendshëm bruto, gati 1 miliardë dollarë brenda vitit. Unë mendoj që do të jetë pak më e lartë, do të shkojë tek 8 përqind dhe do të kalojë 1.3 miliardë dollarë dhe si dëm do të transferohet tek ndërmarrjet. Pra kemi prodhimin. Kjo është ndryshe si krizë nga ajo e vitit 2008, është krizë e sektorit real të krijuar nga frika e pandemisë”.
Ahmetaj tha se në këto kushte vendi gradualisht do të vijojë hapjen, ndonëse kjo hapje është e kushtëzuar edhe nga mënyra se si do të hapen vendet e rajonit.
Duke folur për humbjen e vendeve të punës Ahmetaj pranoi se do të ketë një rënie, por parashikon që rritja të nisë në muajin qershor, kjo falë turizmit për të cilin po mendohet një hapje e kujdesshme.
“Ne po hapemi, por jemi të kushtëzuar edhe nga hapja e rajonit. Italia dhe Greqia janë mbi 85% e shkëmbimit tonë tregtar. Hapja e tyre do na lehtësojë. Punësimi do rimerret që nga qershori. Këtu kemi një element që ka të bëjë me turizmin. Ne turizmin do e rihapim kujdesshëm. Ne do flasim me vende si Çekia apo Polonia për të patur fluturime direkte dhe protokolle bilaterale, për t’i sjellë turistët drejtpërsëdrejti. Deri në shtator, punësimi do jetë ringritur tek 90% e asaj që ishte para krizës, ndërsa ekonomia do rimarri tempin e shkurtit të këtij viti, në janar -shkurt të vitit tjetër”, u shpreh Ahmetaj.
Lidhur me protestën e naftëtarëve të Ballshit që dolën sot në protestë pasi pretendonin se nuk i ka kaluar paga e premtuar nga ministrja Balluku, Ahmetaj tha se, sipas tij 720 punonjës të rafinerive të naftës në Ballsh kanë marrë pagën e luftës prej 40 mijë lekësh të reja.
Më herët edhe Ministrja e Infrastrukturës, Belinda Balluku ka publikuar vendimin e qeverisë të 23 prillit që i ka bërë naftëtarët e Ballshit pjesë të kategorisë përfituese të pagës prej 40 mijë lekë të reja dhe ajo është publikuar tashmë në Fletoren Zyrtare.
