Gjermania do dhurojë 4 milionë Euro për dëmet e shkaktuara nga tërmeti i 26 nëntorit.
Këto para do shkojnë për rindërtimin e shkollave dhe ndërtesave publike.
Lajmin e ka bërë të ditur vetë Ambasadori Gjerman në Shqipëri.
Nëpërmjet një statusi në Facebook, Peter Zingraf, shkruan se është informuar që shteti i tij do mbështes me grante Shqipërinë për rindërtimin e zonave të prekura nga tërmeti.
REAGIMI I PLOTË
Gjermania mbështet rindërtimin me 4 milion euro. Sot ne informuam zyrtarisht qeverinë shqiptare: Qeveria Federale do të mbështesë rindërtimin pas tërmetit të tmerrshëm të 26 nëntorit me grante në shumën e 4 milion euro përmes Bankës Gjermane për Zhvillim (KfË). Me të do të rindërtohen shkolla dhe ndërtesa publike në përputhje me standardet më të fundit të sigurisë dhe efiçensës së energjisë.
Në lidhje me këtë mbështetje, Ambasadori Gjerman në Shqipëri, Z. Peter Zingraf u shpreh: “Gjermania do të ndihmojë Shqiperinë për të rindërtuar shkollat dhe institucionet publike. Ky grant është një nga elementët e mbështetjes Gjermane pas tërmetit të 26 nëntorit i cili traumatizoi shumë shqiptarë dhe shqiptare. Rindërtimi do të shërbejë për rikthimin dalëngadalë në normalitin e jetës së përditshme”.
Grantet do të alokohen nëpërmjet Bankës Gjermane për Zhvillim dhe do përdoren për ndërtimin e shkollave dhe ndërtesave publike me standartët me të fundit të sigurisë dhe eficencës.
