Prej disa ditësh vendi ynë është përfshirë nga reshje të shumta shiu dhe dëbore. Reshjet intensive të shiut kanë bërë që shumë lumenj të dalin nga shtretërit e tyre duke krijuar përmbytje në tokat bujqësore, banesat dhe rrugët.
Por këtyre reshjeve dhe përmbytjeve nuk mund mund t’u shpëtonin as stadiumet në qytete të ndryshme të vendit. Disa prej tyre, kryesisht impiantet e skuadrave të kategorive të ulëta, janë dëmtuar nga reshjet e shiut, çka e bën thuajse të pamundur zhvillimin e ndeshjeve në to.
Duke parë këto kushte dhe dëmet që kanë pësuar stadiumet, Federata Shqiptare e Futbollit ka vendosur që të shtyjë me afat të papërcaktuar rinisjen e Kategorisë së Parë dhe të Dytë. Në njoftimin e FSHF-së thuhet se Klubet do njoftohen në një moment të dytë për rinisjen.
NJOFTIMI I FSHF-së
Komiteti Ekzekutiv i Federatës Shqiptare të Futbollit ka vendosur ditën e sotme shtyrjen e rifillimit të aktivitetit për Kategorinë e Parë dhe Kategorinë e Dytë. Ky vendim u mor për shkak të kushteve të vështira atmosferike, që kanë krijuar problematika të mëdha në infrastrukturën e shumë skuadrave.
Vendimi qarkullues i KE-së i është komunikuar Sektorit të Garave në FSHF, që menjëherë ka bërë njoftimin e klubeve të Kategorisë së Parë dhe Kategorisë së Dytë për shtyrjen e javës së ardhshme të aktivitetit. Situata është në monitorim të vazhdueshëm dhe klubet do të njoftohen në një moment të dytë në lidhje me rifillimin e aktivitetit.
