Pavarësisht kundërshtimeve që patën në fillim, negociatorët ukrainas kanë mbërritur me helikopter për bisedime me palën ruse në Bjellorusi, tha agjencia shtetërore ruse e lajmeve TASS.
Të mërkurën, ministria e jashtme e Bjellorusisë postoi një foto të një dhome konferencash, duke thënë se ajo ishte krijuar për të pritur një raund të dytë bisedimesh.
Kujtojmë që presidenti ukrainas Volodymyr Zelensky refuzoi ofertën ruse për bisedime në Bjellorusi, duke thënë se vet Minsku është përfshirë në pushtimin rus, por është shprehur i hapur për negociata në lokacione tjera.
“Ukraina mbetet e hapur për bisedime sa i përket armëpushimit dhe paqes”, tha zëdhënësi Sergii Nykyforov.
“Po të mos kishte veprime të agresionit nga territori i juaj, do të bisedonim në Minsk… edhe qytetet e tjera mund të përdoren për bisedime. Natyrisht se duam paqe, duam të takohem dhe t’i japim fund luftës. Varshavë, Bratislavë, Budapest, Stamboll, Baku – janë disa prej lokacioneve që ua kemi ofruar”, tha presidenti Zelensky.
Ndërkohë që Viktor Orban ka përsëritur se vendi i tij do të ishte i gatshëm të presë bisedimet e paqes midis Rusisë dhe Ukrainës.
Duke folur për BBC në kufirin Hungari-Ukrainë, Orban tha se përgjegjësia për përfundimin e luftës qëndron, mbi të gjitha, nga pala ruse.
Në të kaluarën, Orban ka pasur marrëdhënie të ngushta me presidentin Putin, me 11 takime në 12 vitet e fundit, më e fundit një muaj më parë në Moskë.
Në të njëjtën kohë, qeveria e tij ka pasur marrëdhënie të tensionuara me Ukrainën, për shkak të një ligji për gjuhën që qeveria thotë se diskriminon pakicën e madhe hungareze në Ukrainë.
