Mëngjesin e sotëm në një konferencë për mediat, presidenti Ilir Meta i bëri të qartë Partisë Socialiste dhe kryeministrit Edi Rama se në 30 qershor nuk do të ketë zgjedhje në Shqipëri. Presidenti Meta gjithashtu firmosi “live” edhe anulimin e zgjedhjeve.
Menjëherë pas konferencës, kryeministri Edi Rama mblodhi Kryesinë e PS, ku Elisa Spiropali ka “sulmuar” me tone të ashpra presidentin Meta.
Ajo shtoi më tej duke thënë se Partia Socialiste do të nisë të enjten procedurat e shkarkimit të Presidentit Ilir Meta.
E ndërsa sot në orën 12:00 është thirrur mbledhja e KQZ pas vendimit të presidentit për anulimin e zgjedhjeve lokale të 30 qershorit. Ka qenë pikërisht nënkryetari i Komisionit Qendror të Zgjedhjeve, Denar Biba dhe anëtari Bledar Skënderi ata që e kanë thirrur këtë mbledhje.
Me mbledhjen e KQZ do të zyrtarizohet rruga që do të ndjekë mazhoranca, ndërkohë që dekreti i presidentit Meta ka mbërritur në këtë institucion.
Nëse KQZ do të vijojë punën, atëherë mazhoranca e quan “nul” dekretin e Metës për shtyrjen e zgjedhjeve të 30 qershorit.
Kujtojmë këtu se mëngjesin e sotëm presidenti Meta shtoi se pa caktuar ai një datë, në Shqipëri nuk do të ketë zgjedhje në 30 qershor.
