Prokuroria e Posaçme ka përfunduar hetimet dhe ka dërguar për gjykim dosjen penale ndaj tre personave të dyshuar për rrjedhje sekretesh shtetërore dhe korrupsion zgjedhor: ish-deputetit socialist Jurgis Çyrbja, Ahmet Mashës dhe të shumëkërkuarit Altin Hajri.
Sipas SPAK, Çyrbja akuzohet se gjatë viteve 2020–2021 ka shpërdoruar funksionin publik duke nxjerrë të dhëna të ndjeshme nga sistemet shtetërore, përfshirë TIMS dhe Policinë e Shtetit.
Informacionet sekrete, që përfshinin planet për kapjen e personave në kërkim, u transmetuan në mënyrë të paligjshme përmes platformave të enkriptuara “Sky ECC” dhe “Matrix”, çka ndihmoi të kërkuarit t’i shmangeshin ndalimeve.
Hetimi zbuloi gjithashtu lidhjet e ngushta të Çyrbjes me Altin Hajrin, person në kërkim për rrëmbimin e Jan Prengës, të cilit i premtoi ndikim mbi institucionet e drejtësisë në këmbim të mbështetjes në fushatë, duke konsumuar elementët e veprës penale të “korrupsionit aktiv në zgjedhje”.
Ndërkohë, Hajri akuzohet për “korrupsion pasiv në zgjedhje”, pasi dyshohet se ka siguruar vota për ish-deputetin.
Ahmet Masha, i treti në këtë dosje, akuzohet për bashkëpunim me Çyrbjen në nxjerrjen e sekreteve dhe përkrahjen e autorëve të krimeve në mars 2021.
Në total, janë dokumentuar të paktën 8 episode rrjedhjeje të informacionit sekret, në periudhën maj 2020- mars 2021, përmes të cilave janë dekonspiruar operacione policore në shkallë vendi, përfshirë edhe Qarkun e Durrësit.
SPAK thekson se informacionet ishin përdorur për të shmangur ndalimet nga drejtësia të personave të përfshirë në krimin e organizuar.
Provat janë mbledhur nga analizimi i komunikimeve të koduara dhe në bashkëpunim me autoritetet franceze, holandeze, belge, si dhe me mbështetjen e Eurojust dhe Europol.
Një tjetër fakt i rëndësishëm është se edhe pas arrestimit të Çyrbjes dhe Mashës në tetor 2024, Altin Hajri ka vijuar komunikimet në “Matrix”, duke diskutuar me të njohur dhe punonjës policie, që dyshohet se i kanë informuar për lëvizjet e uniformave blu.
Çyrbja, i cili ishte deputet në dy legjislatura (2017–2021 dhe 2021–2025), dha dorëheqjen më 9 tetor 2024, ndërkohë që hetimet e SPAK ishin drejt përfundimit. Ai u arrestua më 20 tetor të po atij viti.
