Një deklaratë e dhënë pak kohë më parë nga kreu i Kishës Katolike në botë, Papa Francesko, për një dokumentar televiziv, duket se do të krijojë polemika dhe pështjellime të mëdha në radhët e katolikëve.
Deklarata i referohet një pyetjeje të bërë nga gazetari mbi të ardhmen dhe të drejtat e çifteve homoseksualë, për të cilët Papa Francesko ka dhënë një mendim më tepër të tijin personal se sa si prelati më i lartë në hierarkinë e Kishës.
Në një dokumentar që pritet të transmetohet sonte në Festivalin e Romës, të realizuar nga Evgeny Afineevsky, Papa Françesko deklaron se, njerëzit homoseksualë duhet të mbrohen nga ligjet në gjendjet civile.
“Njerëzit homoseksualë – thotë ai – kanë të drejtë të kenë një familje. Ata janë fëmijë të Zotit dhe kanë të drejtë për të krijuar një familje. Askush nuk duhet të lihet jashtë ose të mbetet i pakënaqur për këtë.
Ajo që duhet të krijojmë është një ligj për bashkësitë civile. Në këtë mënyrë ato mbulohen ligjërisht. Unë për këtë luftova”.
Fjalët e Papës vijnë pas një rruge të gjatë të Kishës, në lidhje me këtë çështje tepër delikate.
Vetëm në vitet e fundit, Kisha Katolike e ka njohur nevojën për legjislacion ‘ad hoc’ për çiftet homoseksuale.
Disa herë kardinalët kanë folur për nevojën për t’u dhënë formë ligjore të drejtave të personave që përbëjnë çifte të të njëjtit seks.
Fjalët e Papa Fraçeskut nuk i drejtohen veç Italisë dhe legjislacionit të saj, por të gjithë botës.
/Burimi: Repubblica.it/ Përshtati: GazetaReforma.com/
