Dje u njoftua publikisht nga hakerat e “Homeland Justice” se kishin nën kontroll faqen e Kuvendit të Shqipërisë, ndërsa sot përmes një reagimi zyrtar nga Kuvendi thuhet se nuk ka humbje të të dhënave nga ky sulm kibernetik.
Në deklaratën e bërë publike ka kontradita mes paragarfëve, pasi Kuvendi thotë se po punohet për të zbuluar pasojat që ka sjellë ky sulm.
Po çfarë pasojash ka në sistemin e Kuvendit të Shqipërisë, kur nuk ka asnjë humbje të të dhënash? Kësaj pyetje duhet t’i përgjigjet institucioni i lartë i Republikës së Shqipërisë, Kuvendi.
Deklarata e Kuvendit për mediat:
“Gjatë ditës së djeshme është konstatuar një sulm kibernetik ndaj institucionit të Kuvendit të Shqipërisë. Sipas ekspertëve, nga ky sulm është synuar ndërhyrje në infrastrukturë dhe tentativë për fshirje të të dhënave. Ju bëjmë me dije se nuk janë prekur të dhënat në sistem dhe ekspertët janë angazhuar plotësisht, që prej momentit kur kanë detektuar këtë ndërhyrje nga jashtë institucionit.
Ekspertët e IT po punojnë për të zbuluar se çfarë pasojash ka sjellë ky sulm në sistemin e Kuvendit të Shqipërisë. Për sa më sipër, dalja LIVE e shërbimeve kërkon kohë pasi po kontrollohen të gjitha detajet dhe vijon puna për të kthyer në normalitet faqen e Kuvendit të Shqipërisë”, thuhet në njoftimin e Kuvendit.
