Kryeministri Edi Rama ka reaguar për deklaratat e Gjermanisë në lidhje me “Ballkanin e Hapur”. Në një postim në Twitter, Rama shkruan se qeveria gjermane thotë se projekti duhet të jetë gjithëpërfshirës dhe dera është e hapur për të gjithë.
Kryeministri thotë se qeveria gjermane e mbështet “Open Balkans”, ndryshe nga çfarë u thuhet njerëzve në Prishtinë e Tiranë. Megjithatë thotë Rama, askush nuk mund të përshihet me zor.
“Open Balkan thotë qeveria gjermane duhet të jetë gjithëpërfshirës dhe po, patjetër, kështu duhet të jetë e ndaj dera është e hapur, por as nuk përfshijmë dot kënd me zor, as nuk rrimë dot të presim sa t’u mbushet mendja atyre që s’duan të kuptojnë se kjo është rruga e të ardhmes!
“ÇUDI”! Qeveria gjermane e mbështeska Open Balkan ndryshe nga çfarë u thuhet njerëzve në Prishtinë e Tiranë prej atyre që s’pyesin për Amerikën dhe jo vetëm kaq, po kërkon nënshkrimin urgjent të marrëveshjeve për Tregun e Përbashkët Rajonal para Samitit BE-Ballkan në 6 tetor!”- shkruan Rama.
Ditën e sotme një nga zëdhënësit e kancelares gjermane, Angela Merkel, deklaroi se çdo lloj bashkëpunimi rajonal është i dobishëm dhe është e rëndësishme që të përfshihen të gjashta vendet e rajonit në projekt.
