Kina shpesh herë është akuzuar se është bërë shkak që bota të pushtohet nga Covid-19, pasi virusi ka dalë nga një laborator në Wuhan.
Madje presidenti i SHBA Donald Trump ka shkuar edhe më tej duke paralajmëruar se do i jape fund marrëdhënieve me Kinën.
Pas gjithë zhurmës së krijuar Instituti Kinez i Virologjisë ka pranuar se në qytetin ku edhe u shfaq Covid-19, ka patur tre viruse të gjalla të lakuriqëve të natës por asnjë prej tyre nuk përputhet me atë që po shkakton kaos në të gjithë botën.
Drejtoresha e këtij institute tha për televizionin shtetëror kinez CGTN se pretendimet e presidentit amerikan, Donald Trump, dhe të tjerëve, se virusi mund të ketë dalë që andej, janë gënjeshtra të pastra.
“Ne kemi izoluar dhe siguruar disa koronaviruse nga lakuriqët e natës. Tani kemi tre viruse të gjalla. Por, ngjashmëria më e madhe e tyre me sars cov 2 shkon deri në 79.8 për qind”
Një nga ekipet e kërkuesve të institutit, ka bërë kërkime për koronaviruset tek lakuriqët e natës që nga 2004 dhe është fokusuar tek gjurmimi i burimit të sarsit, virusi që qëndron pas një tjetër epidemie rreth dy dekada më parë.
“Ne e dimë se e gjithë gjenoma e sars cov 2 është vetëm 80 për qind e ngjashme me atë të sarsit dhe ky është një dallim i dukshëm. Ndaj, kërkimet e mëparshme nuk i kanë kushtuar vëmendje viruseve që janë më pak të ngjashëm me virusin Sars”.
Ndërkohë edhe Organizata Botërore e Shëndetësisë është shprehur se Uashingtoni nuk ka dhënë prova për të mbështetur pretendimet spekulative.
Ky reagim ka ardhur pas akuzave të drejtpërdrejta të Trump se OBSH dhe Kina me qëllim vonuan shpalljen e pandemisë.
Nga ana tjetër, janë rikthyer tensionet në Hong Kong, pasi Policia ka hedhur gaz lotsjellës dhe ujë qytetarëve që protestojnë kundër planeve të Kinës për të vendosur një ligj të ri të sigurisë në territor.
Mijëra demonstrues kanë marshuar nëpër qendrën e qytetit.
Më herët, 200 politikanë nga e gjithë bota lëshuan një deklaratë të përbashkët duke kritikuar planin e Kinës.
Kina po kërkon të miratojë një ligj që do të ndalojë “tradhtinë, shkëputjen, rrëzimin dhe shkatërrimin” në territor.
Udhëheqësi i Hong Kongut, Carrie Lam, i cili konsiderohet si pjesë e vendosjes politike pro-Pekinit, është zotuar për mbështetje të plotë për ligjin e propozuar dhe tha se liritë e qytetit do të mbeten të pandryshuara.
“Projektvendimi”, siç dihet përpara aprovimit nga Kongresi Popullor Kombëtar i Kinës thotë se Hong Kongu “duhet të përmirësojë” sigurinë kombëtare.
