Analisti Andi Bushati ka bërë një deklaratë të fortë, duke thënë se gazetarët që mbrojnë kryedemokratin Lulzim Basha, paguhen nga kryeministri Edi Rama. Ai është shprehur se askush nuk e kishte imagjinuar që analistët pro-Rama do të mbronin me kaq pathos Bashën, pasi lekët i marrin tjetërkund.
“Do kthehet në urim, paç fatin e Bashës. Askush nuk do e kishte imagjinuar që do e mbronin me kaq pathos analistët pro-Rama.
Këtij i vënë gjoksin dhe pa komplekse, se lekët i marrin tjetërkund”, ka thënë Bushati.
Kujtojmë që reagimet ndaj kreut demokrat Lulzim Basha, kanë qenë të shumta që kur ai vendosi të përjashtonte nga grupi parlamentar i PD, ish-kryeministrin Sali Berisha. Disa ditë më parë gazetari Bledian Koka deklaroi se Basha ka vila tek një oligark në Sauke dy të tjera tek një oligark në Hamallaj. Ndër të tjera, Koka deklaroi se Basha nuk ka ardhur në PD për t’u bërë kryeministër, por për t’u pasuruar.
Ndërkohë, përjashtimi i Berishës nga grupi parlamentar democrat ka sjellë mjaft tensione edhe Brenda partisë. Ditën e djeshme kryesia e Forumit Rinor të Partisë Demokratike i dërgoi një shkresë Sekretarit të Përgjithshëm Gazment Bardhi, kreut të Këshillit Kombëtar, Edi Paloka dhe kryesisë së partisë, ku kërkonte që të mbahej një referendum me anë të të cilit anëtarët të votonin për çështjen “Berisha”. Po dje, ish-kryeministri Sali Berisha njoftoi se ditën e sotme do të nisë një tur në të gjithë vendin ku do të bashkëbisedojë me demokratët, për një parti më të hapur e më të fortë.
