Ish-Prokurori i Përgjithshëm, Adriatik Llalla ka deklaruar se ish-ambasadorja e Bashkimit Europian në Shqipëri, Romana Vlahutin, i ka kërkuar të arrestonte Sali Berishën. Llalla e bëri deklaratën në emisionin “Çim Peka live”, ku tha se Vlahutin i kishte kërkuar që të ndiqej shembulli i Kroacisë.
Më tej ai shtoi se nuk ka pasur në asnjë moment prova që e përfshinin Berishën në një situatë paligjshmërie, ndërsa bëri të ditur se kishte njoftuar edhe presidentin e asaj kohe, Bujar Nishanin. Llalla tha se Nishanit iu duk e pabesueshme diçka e tillë, ndërsa Vlahutin kishte shkuar në zyrën e tij për ta sqaruar këtë debat.
“Për Berishën po, më është kërkuar që të arrestohet, një kërkesë që është bërë nga ambasadorja e BE-së Romana Vlahutin që të arrestohet dhe të ndiqet shembulli i Kroacisë.
Ajo më tha se, që Shqipëria të futet në BE duhet të ndjekë rrugën e Kroacisë dhe të arrestojë Sali Berishën dhe ti ke rastin që të tregosh forcën tënde të ndihmosh Shqipërinë të futet në BE. Ajo ka përfituar nga rasti që ishte në statusin e diplomates, sepse në kushte të tjera kjo është e patolerueshme për secilin qytetar të lirë kërkohet arrestim pa prova është absurditet që kërkon të hysh në zyrat e një shteti të pavarur dhe ti imponohesh në forma të tilla”, tha Llalla.
