Ditën e sotme situata e rënduar e redhjeve ka sjellë probleme pothuajse në çdo qytet. Për qytetarët e Durrësit gjithashtu. Kompania e Ujësjellësit dhe Kanalizimeve në Durrës ka lajmëruar qytetarët se mund të ketë një problem në furnizimin me ujë gjatë dy ditëve të ardhshme. Sipas njoftimit të publikuar, kjo ka ardhur si pasojë e defektit të shkaktuar nga moti i keq në zonën e Fushë Milotit.
Njoftim për shtyp!
Ujësjellës Kanalizime Rajoni Durrës, njofton abonentët se mund të ketë problem në furnizimin me ujë gjatë dy ditëve të ardhshme.
Shkak është bërë një defekt që ka ndodhur mëngjesin e sotëm, i shkaktuar nga moti i keq dhe shkarkimet e shumta, në zonën e Fushë Milotit. Për shkak të këtyre shkarkimeve, transformatori kryesor i tensionit 35/20 kv është dëmtuar dhe i gjithë stacioni është jashtë kushteve të punës.
Grupet e punës së OSHEE dhe të Ujësjellës Kanalizime Rajoni Durrës ndodhen në terren për të zëvendësuar transformatorin e djegur.
Si pasojë e situatës emergjente, gjatë ditës së sotme dhe nesër, do të ketë reduktim të orarit të furnizimit me ujë për të gjithë bashkinë e Durrësit dhe zonat rurale.
Ujësjellës Kanalizime Rajoni Durrës kërkon ndjesë dhe mirëkuptim për shqetësimin e krijuar!
Kujtojmë se ditën e sotme edhe në Tropojë situata paraqitet e rënduar për shkak të reshjeve të dendura që kanë sjellur përmbytje masive. Pemë të rrëzuara, prezencë uji në banesa, rrugë të përmbytura, është kjo panorama apokaliptike, që vjen nga Tropoja si pasojë e reshjeve të shiut.
