Kombëtarja jonë po bëhet gati për dy ndeshjet e radhës dhe më të rëndësishmet, kualifikueset e Ligës së Kombeve me Kazakistanin më 15 nëntor dhe me Bjellorusinë më 18.
Në një konferencë për shtyp ditës e sotme, protagonistë ishin dy lojtarët Berat Gjimshiti dhe Ramen Çepele.
17-vjeçari Çepele i cili luajti ndeshjen e tij të parë kuqezi ndaj Kosovës teksa iu përgjigj pyetjeve të gazetarëve tha se ishte i emocionuar dhe krenar pas ndeshjes së parë me Kombëtaren dhe se ishte pozitiv për dy ndeshjet e radhës. Edhe pse ende i vogël në moshë, Çepele u shpreh se për të qenë titullar duhet të presë momentin dhe gjithashtu foli edhe për karrierën e tij jashtë vendit, për kalimin nga Inter tek ekipi i Hannoverit.
“Është një emocion i paparë, është një gjë fantastike, është krenari debutimi me Kombëtaren shqiptare. Është shumë bukur të jesh këtu, të gjithë lojtarët e tjerë më kanë ndihmuar shumë, më kanë qëndruar afër gjithë kohës dhe nuk kam ndjerë shumë vështirësi.Pothuajse të gjithë lojtarët nga skuadra më kanë qëndruar pranë në këtë fillim, kam edhe njërin këtu afër që më ka ndihmuar shumë (Berat Gjimshiti) dhe e falënderoj.Gjithçka mund të ndodhë, unë shpresoj shumë që të shkojmë në Europian dhe në Botëror. Do të ishte diçka fantastike për të gjithë shqiptarët.
Them që duhet të pres momentin tim. Tani jam akoma i vogël, kam shumë për të bërë, por do jetë sigurisht një gjë shumë e bukur nëse do të arrija të fitoja një vend titullari në të ardhmen.
Kalimi nga Inter te Hannover – Te Hannover kam më shumë shans për të shkuar tek ekipi i parë. Në Itali është shumë e vështirë, nuk i vlerësojnë shumë lojtarët e vegjël. Te Hannover them që kam më shumë shanse ndaj edhe vendosa të shkoj atje.
Them që fitorja në miqësoren me Kosovën na ndihmon shumë për të qenë pozitivë dhe optimistë për sfidat e radhës. Unë jam shumë pozitiv për këto dy ndeshje dhe shpresoj të bëjmë mirë.”
Në dy ndeshjet e radhës Shqipërisë i duhet të fitojë për të rrëmbyer kreun e grupin dhe për ti dhënë më shumë qetësi trajnerit për pjesën e mbetur të Ligës së Kombeve dhe për të vijuar me besim e shpresë projektin e FSHF-ës për të synuar kualifikimin për në “Euro2024”.
